በቦሌ ደ/ገ/ቅ/ጊዮርጊስ እና ቅ/ገብርኤል ቤተ ክርስቲያን የቅዱስ ጊዮርጊስ በዓለ ዕረፍት በድምቀት ተከበረ

ብፁዕ አቡነ መልከጼዴቅ የአዲስ አበባና የጉራጌ አህጉረ ስብከት ሊቀ ጳጳስ በተገኙበት በቦሌ ደ/ገ/ቅ/ጊዮርጊስ እና ቅ/ገብርኤል ቤተ ክርስቲያን የቅዱስ ጊዮርግስ በዓለ ዕረፍት በድምቀት ተከብሯል።

የ2013 የቅዱስ ጊዮርጊስ በዓለ ዕረፍቱ ሚያዚያ 23 በሕማማት ውስጥ የዋለ በመሆኑ ክብረ በዓሉ ተሻግሮ ዛሬ ሚያዚያ 27/2013 ዓ/ም ተከብሮ ውሏል።

በዕለቱ በመጋቤ ሐዲስ ቆሞስ አባ ኒቆዲሞስ የቅድስት ሥላሴ ካቴድራ የመጽሐፍ መምህር ትምህርት ተሰጥቷል።

መምህሩ ” መንፈስ ቅዱስ በእናንተ ላይ በወረደ ጊዜ ኃይልን ትቀበላላችሁ፥ በኢየሩሳሌምም በይሁዳም ሁሉ በሰማርያም እስከ ምድር ዳርም ድረስ ምስክሮቼ ትሆናላችሁ ።” (የሐዋ. ሥራ 1:8) በሚል መነሻነት በዓሉን በተመለከተ ሰፋ ያለ ትምህርት ሰጥተዋል።

በክብረ በዓሉ በሊቃውንትና በሰንበት ት/ቤት ወጣቶች በዓሉን በተመለከተ ያሬዳዊ ዝማሬ ቀርቧል።

በክብረ በዓሉ የተገኙት ብፁዕ አቡነ መልከጼዴቅ ለምእመናኑ ቃለ ምዕዳን ሰጥተዋል። ብፁዕነታቸው በዓሉን ስናከብር ቃሉን በማክበር በፍቅር እየተመላለስን በንስሓ ታጥበን ሥጋሁና ደሙ እየተመገብን ለዘለዓለም ሕይወት ተዘጋጅተን ልንኖር ያስፈልጋል ብለዋል።

በክብረ በዓሉ መልአከ ሕይወት አባ ወልደ ኢየሱስ ሰይፈ የአዲስ አበባ ሀገረ ስብከት የካህናት አሰተዳደር ዋና ክፍል ኃላፊ፣ መ/ብርሃን ሩፋኤል የማነ ብርሃን የቦሌ ክፍለ ከተማ ቤተ ክህነት ዋና ሥራ አሰኪያጅ፣ የደብሩ የአስተዳደር ሠራተኞች፣ ካህናት አገልጋዮች፣ የሰንበት ት/ቤት ወጣቶችና በርካታ ምእመናን ተገኝተዋል።

ፎቶ መ/ር ዋሲሁን ተሾመ