“በሞቱ ከመሰልነውም: በትንሳኤው እንመስለዋለን” ሮሜ. 6:5

ለአዲስ አበባ ሀገረ ስብከት ፅ/ ቤት ሰራተኞች፣ ለገዳማትና አድባራት አስተዳዳሪዎች እንዲሁም ለሁሉም ምእመናን በያላችሁበት መልካም ሰሙነ ህማማት( የፀሎት፣ ስግደት እና የቅዱሳት መፃህፍት የንባብ ጊዜ) ይህንላችሁ::

ትንሳኤውን ለማየት በህማማቱ በኩል ማለፍ/ መሳተፍ እንደሚገባ ሲያመለክት ቅዱስ ጳውሎስ “ሞቱን በሚመስል ሞት ከእርሱ ጋር ከሞት፣ ትንሳኤውን በሚመስል ትንሳኤ ከእርሱ ጋር እንነሳለን” ያለውን ኦርቶዶክሳዊት ተዋህዶ ቤተክርስቲያናችን ሙሉ በሙሉ ተግባራዊ ታደርገዋለች: ስለሆነም የቤተክርስቲያናችን ቅፅሮችና በሮች በሰሙነ ህማማት በመአልትም በሌሊትም ተከፍተው ካህናት ከሌሊት ጀምረው ለሰሙነ ህማማት የተሰራውን ስርአተ ፀሎት፣ ስግደት፣ ንባባት እያደርሱ ቆይተው ሲነጋ ምእመናንም ከስርዓተ ፀሎቱ ተቀላቅለው አብረው ሲፀልዩ; ሲሰግዱና ከቅዱሳት መፃህፍት ስለ ክርስቶስ ህማምምና መከራ መስቀል እያነበቡ ይውላሉ: በዚህም የክርስቶስ የህማሙና መከራው አሳቢዎች ሳይሆን ተሳታፊዎች በመሆን ሳምንቱን አሳልፈው ወደ ትንሳኤው ይሸጋገራሉ::

እንግዲህ የተከበራችሁ ካህናት እና የተወደዳችሁ ምእመናን ሁላችንም በያለንበት ቅድስት የቤተክርስቲያናችን አባቶች የሰሩልንን ቀኖና እየፈፀምን: መድሀኒታችን ኢየሱስ ክርስቶስ ማህየዊት( አዳኝ) በምትሆን ህማሙ ከቁስለ ነፍስ ወስጋ; ከደዌ ነፍስ ወስጋ እንዲፈውሰን በዚህ ሰሙነ ህማማት እንትጋ::

መልካም ሰሙነ ህማማት

አባ መልከፄዴቅ የ አ/ አ/ እና የጉራጌ አህጉረ ስብከት ሊቀ ጳጳስ